sina toki tawa mi la seme li suli?

lawa mi li nasa mute a tawa nasin kulupu tawa ante. nasa ni la toki li lon ala kalama lon ala sitelen la mi ken sona ike e ante! sina toki musi la sina pilin ike la mi ken sona ala e ni. ante la lawa mi li nasa mute tawa kute kin. nasa ni la mi ken sona ike e kalama toki. kalama li mute la sona mi li kama ike mute kin a.

nasa ni la o awen suwi tawa mi! toki mi li ken ike e pilin sina, taso tenpo mute la ni li wile mi ala a li kama tan ala wile mi. mi ike e sina la ni li wile mi a: sina wile la sina toki e ike e tan ike tawa mi. mi wile kama sona. lon la mi lawa ala e sina, taso mi ike e sina la mi wile kama suwi sin tawa sina.

ante la mi toki tawa ante la selo mi li lon. toki li kama ala jaki la o kama lon insa ala pi selo ni!

namako toki li seme?

mi sona ike la toki li lon ala sitelen la ni li pona tawa mi: toki li kama lon sitelen. ni li ken tan namako toki. pona ni la ona li lon nasin toki mi. ona li lon ala nasin toki sina la mi lawa ala e sina, taso sina wile ni la toki li kama pona mute tawa mi!

namako seme li lon nasin toki mi?:
/musi: mi toki musi. toki mi li ken lon ala.
/musi ala: mi toki musi ala. o musi ala e toki.
/pona: toki li sama pona li sama ike la o sona e ni: toki li pona.
/ike: toki li sama pona li sama ike la o sona e ni: toki li ike.
ante: ante la mi ken toki suli e namako sama ni: "/mi pilin ike tawa ala sina".

namako ni li lon pini pi toki sitelen li sitelen e sitelen ala ni: sina toki seme? mi o sona e ante seme? jan lukin li sona ala e namako la ona li awen toki e ni: jan toki li pilin e ni: jan lukin li ken sona ike e toki. o pakala ala e ona tan musi taso! ni li musi ala tan ni: toki li kama ike li kama jaki. jan li ken pilin suwi tawa namako la ni li kama ike kin.